速食店.超商借用循環杯服務 北市欲擴大推行

環保署規定,對明年7月開始,就欲禁止使用保麗龍的飲料杯仔,消費者紮杯仔去儲飲料、店家也愛俗予人客。台北市已經有佮業者合作,這馬欲共借環保杯仔的服務、辦閣較大,希望減少、飲料杯仔、所產生出來的糞埽。

掃qr code,門拍開,提出循環杯;飲料啉煞,仝款用機器就會使還。這是台北市環保局當咧推捒的循環杯機台,市府佮連鎖業者合作,強調有手機仔就會使來使用,解決推捒環保杯,民眾定定反應的問題。

連鎖餐廳業者:「民眾家己準備環保杯,定定會有便利性的問題,伊就親像ubike的概念,也就是民眾行到佗,伊就親像ubike,伊會使真方便去借用佮歸還」。

環保署規定,明年7月開始禁止使用pho͘-lí-lóng的飲料杯仔,連鎖飲料店、便利商店等等,愛予自備環保杯的消費者至少5箍的優惠,而且會使對使用一次性杯仔的消費者收費。毋過疫情猶未結束,外界對這款循環杯、難免煩惱會相穢。

臺北市環保局資源循環管理科科長 林鈺惠:「咱循環箱使用過的容器,每工至少會收一擺,阮專業的物流,會送到專業的清洗場,清洗場的作業規範,需要符合衛福部的規範,每季會送SGS做一擺檢驗,來確保循環容器的安全衛生」。

環保局表示,循環杯的服務是對今年10月開始推捒,目前當咧走揣閣較濟的合作店頭,向望一年的示範期間,會使達到2萬7千擺的使用,減少一次性容器的使用。



 

全台敬老金大調查

相關新聞