家扶:46%個案愛疾病照護 18%照顧者是囡仔

家扶基金會今仔日表示,佇𪜶服務的個案內底,欲到一半的家庭照顧者有病疼的困擾,欲到兩成的序細,著愛負擔照顧厝內面的人的責任,對猶未轉大人的囡仔來講,是真大的負擔。

小玟徛佇台頂,伊因為疾病,身體淡薄仔敧一爿,需要長期使用靠輔助的家私來矯正,媽媽佮伊攏有仝款的病,這對單親家庭來講,是真大的負擔。另外一爿,嘛是單親的阿昊,因為媽媽著病,阿昊需要擔照顧的責任。

主持人家扶扶助個案,阿昊表示:「所以你愛真早起床?嗯。起來共媽媽的早頓攢好勢,才去坐公車,坐點半鐘去學校。下課咧?轉去厝整理一下,才閣去病院。」

家扶基金會統計,服務的千外个家庭內底,有46%的家庭照顧者有病疼的困擾,18%的家庭囡仔需要擔照顧厝內人的工課,佇疫情之下,狀況更加困難。

家扶社會資源處處長,林秀鳳表示:「經濟困難,親友的能力、資源閣無夠,𪜶欲應對風險,拄著危機承受會閣較大。」

家扶基金會表示,今年因為疫情,募資的狀況有較差,今年並舊年減4千萬。明年的目標希望會使募著7千萬,共環境困難的家庭鬥相共。

相關新聞

專題|全台敬老金大調查