作家鄭順聰出版臺語詩有聲冊 走揣臺文新聲勢

臺語會當佇日常對談、報新聞、國會論政,甚至是談戀愛、表達心情。作家-鄭順聰,最近有出一本臺語詩集《我就欲來去》,內底用真濟媠氣的臺語來講家己的心情,而且閣有揣幾个人來配音。

一首詩有幾若種配音,聽的人感受無仝的氣口。作家鄭順聰頭一本台文詩集我就欲來去,分做心情、14逝詩佮自由詩三類。

作家,鄭順聰表示:「我希望講咱這馬共台語的口語,阮自細漢聽著的口語,佮這馬咱這个新的台文運動,所有的成果共敆做伙,去寫咱這馬現代人的心情,我感覺這是我,我就欲來去,我希望有一个清飄的感覺,向望咱台語詩有新的聲勢。」

鄭順聰表示,這本詩集粒積五冬的字句,共生活拄著的心情、心肝頭的話用短短的字來訴情,也共一寡仔咱這馬華語講著的字,創作新的台文詞,新字句也希望共台語對語言提升至文學的層面。

作家,鄭順聰表示:「這語言就像一个工具,共咱的心情講出來,共咱看著的代誌,共掠落來、寫落來,閣來就是會當去創作咱新的語言,所以咱內面足濟新詞、新的字句、新的詞的用法,我希望咱台語毋但是語言,講會通就好,猶是強調咱台語的氣口,是講咱台語就是創作一个新的語言。」

另外佇心情詩的部份,版面也特別設計通參羅馬字對照看,鄭順聰講,希望這本詩集,通予逐家對聲音、對羅馬字等等開始,對詩的文學沓沓仔去了解。

全台敬老金大調查

相關新聞