臺灣設計展佇嘉義 展現在地風格佮意象

台灣設計展12/24就欲起鼓矣,佇嘉義文創園區的主要展館,12/18、19這兩工也對外試營運,其中有一个展覽館的主題號做「拄拄好」,欲展現嘉義的生活風格。

佇台灣設計展的試營運現場看到沙畫,家長佮囡仔逐家攏耍共誠歡喜,嘉義市各學校的校長嘛看甲誠認真,希望紲落來會當向學生來紹介。

民眾,曾小姐表示:「會當更加了解嘉義的一寡環境,會當予囡仔去認捌原來嘉義市,有遮的文化佇內底。」

嘉義市教育處長,林立生表示:「會當予囡仔對台灣設計展有新的體驗以外,會當對這个城市,對家己生活的所在有閣較深的認捌。」

佇展館內底,有車站的形象,嘛有用科技佮文字的方式,表達在地的感情,老藥房、老醫館、老師傅,閣有嘉義雞肉飯的創意表現,規劃單位表示,遮的物件所累積的,就是嘉義這座袂緊袂慢,生活拄拄好的城市。

民眾,周先生表示:「真有共鳴,就是以在地嘉義人來講的話,就對以前的印象閣回想起來。」

台灣設計展分區策展人,黃銘彰表示:「阮對速度、時間佮大細三个方向,來講嘉義的拄拄好,包含速度方面慢甲拄仔好,時間方面老甲拄仔好,佮大細方面細甲拄仔好。」

12月24台灣設計展就欲來開始,18、19這兩工,佇嘉義文創園區的展覽館提早向嘉義市民開放,希望除了增加宣傳,嘛會當做最後的準備。

相關新聞