南部空品紅色警示 冷氣團帶汙染.ﰴ空氣袂散

這兩工中南部空氣品質無好,環保署透早針對高雄、屏東、台南發出警報,特別是高雄出現紅色警示,汙染物是PM2.5,所有民眾攏愛注意,雖罔冷氣團吹北風,空氣品質會當改善,毋過嘛會共一寡境外的汙染物吹來南部。

透早起來,高雄就是按呢霧霧的,看袂清楚,高雄的空氣品質不良,已經出現紅色警示,毋但高雄人,外地人攏有感受。

高雄民眾表示,「掛喙罨鼻仔是無感覺,毋過看空氣就有感覺這兩工攏是啊。」

高雄市環保局空污與噪音防制科長 朱進宏講,「對透早四五點彼陣到這馬,沓沓仔對兩三个測站到這馬目前是九个測站,目前濃度有開始降。」

到中晝高雄有十个測站出現紅燈,其實這幾工高雄空氣攏無蓋理想,12/17這工是寒天以來第一擺紅色警示,對所有的人攏無健康,環保局表示,主要是北風共西爿的汙染物攏吹到南部來,中晝過後就會改善,in嘛已經要求電廠佮工廠降載、減排。

高雄市環保局空污與噪音防制科長 朱進宏講,「興達電廠要求伊兩个燃塗炭的機組停止,其他的工廠昨昏要求啟動降載減排措施。」

環保局講,12/17下晡冷氣團落南,汙染物會散去,毋過嘛會帶來境外汙染,到時高雄降到柑仔色提醒,建議民眾猶是莫佇戶外運動,喙罨攏愛掛予好。

全台敬老金大調查

相關新聞