屏東熱博會欲起鼓 學生今佈彩稻欲做尪仔圖

屏東熱帶農業博覽會,逐年攏唌上百萬人來參觀,明年又閣推出新的「迪士尼」角色的彩色稻仔圖,南榮國中的學生也做伙佈田,期待明年正月會當看著一大片美麗的風景。

學生跤踏入去田內,體驗佈稻仔,才知影作穡人的辛苦,𪜶佈的秧仔,看詳細,有淡薄仔無仝款,是紫紅色的,明年一月,遮的田就會生出迪士尼經典角色的彩稻,負責設計種作的就是這位東港的農民林清源。

農民,林清源表示:「予阮團隊來轉圖,畫座標、佈稻仔攏阮來用,色水有四種色水,紫紅色、烏色、白色、黃色,予迪士尼揀,看按怎搭配。」

屏東的熱帶農業博覽會今年是第七冬,逐年的3D彩稻圖攏無仝,攏是林清源𤆬農民做伙種出來的,嘛是民眾上愛翕相拍卡的景點,2022年的換奇妙仙子佮三眼怪等等五个角色,來行銷屏東佮台灣的農業。

屏東縣長,潘孟安表示:「開放前會看疫情來決定,閣做滾動檢討,防疫是咱生活必須的。」

今年初活動因為拄著疫情,園區縮減嘛限制參觀的人數,明年1月的熱帶農業博覽會,嘛會看疫情調整防疫措施。

全台敬老金大調查

相關新聞