序大.囡仔做陣演古早生活 增加互動.在地認同

「看著這領衫，就想著講，阿母較早的辛苦。」

社區的序大佇大樹仔跤來講故事，講𪜶佇這个沿海庄頭較早的生活，學校的囡仔著配合故事來搬戲，嘉義縣東石鄉蔦菘社區的序大，佮港墘國小的囡仔，做伙用這齣風吹樹下咱的故事，展現𪜶的學習成果。

演出長輩，余女士表示：「囡仔嘛會到阮社區的活動中心，有時陣阮嘛會來到港墘國小，這爿的場地來練習。」

東石鄉港墘國小校長，劉妙珍表示：「囡仔佮阮社區序大的互動，搬一齣戲，對囡仔來講，伊嘛是一個非常難得的經驗。」

經過三個月的課程，遮的序大佮囡仔毋但學會曉用肢體來表演，嘛培養生活的美學，替𪜶安排課程阮劇團表示，25个人來演三段故事，對過去生活的記持開始，一直到這馬逐家互相陪伴的過程。

指導老師，郭奕錡表示：「雖然阿公阿媽每一擺攏講無仝的台詞，但是我感覺對𪜶這馬的年歲來講，這是一个誠好的經驗佮體會。」

阮劇團副團長，蔡明純表示：「對學校連結社區，然後阮感覺這之間的過程，是予閣較濟人會當體會藝術的力量，佇這个過程當中，劇團嘛有得著誠濟能量。」

嘉義縣文化基金會指出，專業人員來教民眾表演，透過創意、觀察佮交流課程，予在地的人搬在地的戲，講在地的故事，嘛替東石增加在地認同。