"彰化平原無名英雄"特展 說臺灣街頭運動歷史

二二八事件紀念基金會,最近舉辦一場「彰化平原無名英雄」特展,展出1987年到2000年,臺灣街頭運動的過程。嘛是頭一改用參與抗爭的群眾做主角,透過相片、影片等等,予咱看著爭取過程,攏是有一寡無名英雄咧替咱拚出民主佮自由。

影片呈現街頭運動、民眾對抗警備單位等等,搭配策展人也是作曲家劉學軒特別創作的無名英雄交響曲,呈現對解嚴前後到第一改政黨輪替,台灣街頭運動的風起雲湧。

拓展文教基金會董事長,翁金珠表示:「當時予400个鎮暴警察規个圍牢,當時中部的團管區,金司令就佇現場講,今仔日我若予你行出這一步,我一定佇遮就切腹自殺,結果阮佮伊衝突了後,阮抑是衝破,彰化縣第一改的遊行,就是對阮這改開始。」

像這張平反二二八,群眾主張公布代誌真相、閣有爭取農民權益佮環保運動等等,遮的事件背後,真濟抗爭者雖然毋知名,煞是民主化背後的無名英雄,翁金珠也表示,伊用六冬時間口述訪談,採訪欲300位基層民眾,用影片、文字等等記錄歷史,這也是頭改有展覽用抗爭的民眾做主角,紹介予外界知影。

拓展文教基金會董事長,翁金珠表示:「綴咱佇街頭運動爭取民主自由,抑是講今仔日有政黨輪替,遐的基層、草根運動者,無名姓咱也無熟似的,沓沓仔共伊揣出來,共伊做採訪、做記錄,我想按呢台灣的民主運動,彼个鬥圖才會較完整。」

《這个民主台灣的街頭運動-彰化平原無名英雄展》,將縛黃絲帶的路閘囥佇展覽現場,希望予民眾感受上街頭面對威權,攑拳頭喝出家己訴求的感覺,體會台灣人一步一步行過遮的路途,才有這馬的民主成果。

全台敬老金大調查

相關新聞