國家人權館整治剉24欉樹 環團:破壞歷史景觀

有民眾去投訴,講國家人權博物館的景觀工程共24欉大樹攏剉掉。護樹團體今仔日開記者會批評,這毋但是損害歷史景觀,嘛無尊重受難者前輩所種落來的樹仔。毋過博物館表示,剉掉的樹仔毋是受難者種的,而且有的已經破病,無法度正常成長矣。

剉斷的大樹,規欉用吊車吊起來,慢慢囥佇塗跤。立法委員陳椒華接著民眾投訴,講國家人權博物館佇咧進行景觀工程的時,竟然共館區內底24欉大樹剉掉,批評這是無尊重受難者前輩所種的遮的樹仔,嘛損害珍貴的歷史景觀。

台灣環境生態護育產業工會理事長何承翰:「有一寡樹仔伊完全無病蟲害,甚至伊嘛無礙著交通跤路。(樹仔)伊其實是見證這个所在的變遷,若是樹仔伊留落來,伊就會使是一个代表,共咱講以前有啥物變化。」

毋過館方表示,剉掉的樹仔,是因為無健康、已經無法度正常成長,有的因為破病,已經蛀甲變空心矣。若無就是有礙著園區內底的歷史建築,而且毋是受難者前輩所種的。

國家人權博物館代理館長張嬋娟:「上懸的原則是,全園區的保存是上懸的原則。若是真正無法度徙栽,才進行移除。移除計畫進前新北市文化局已經審查通過,嘛提供相關的建議,目前當咧修改。」

館方表示,目前的工程,是欲共園區內底的景觀,根據歷史文件,恢復成1980年代、美麗島大審時的模樣。針對民眾的質疑,會全面過點園區的樹仔,嘛提報資料予主管機關審核。

全台敬老金大調查

相關新聞