臺北85冬舊廈門街派出所 完成修復重新開放

日本時代起的,台北市舊廈門街派出所,誠有現代主義的風格。進前險險拆掉,佳哉經過文化局佮民間合作,這陣已經修復完成,開放參觀。

廈門街這棟舊派出所佇1936年完工,規面壁是以特殊模樣的thai3-lu3來裝飾,呈現出彼當陣的現代主義風格。落尾派出所徙位、因為建築傷過舊,原底按算拆除。毋過這馬修復了後,號做廈川玖肆,重新開放。

廈川玖肆主理人曾士綱:「伊佮傳統咱知影的古蹟,彼種木造的,傳統日本式,佮和洋混合彼種攏無仝,這種現代主義風格其實真適合,行入一般人的日常生活。

規桌頂的thai3-lu3,攏是為著修復舊派出所,所設計出來的貨樣。台北市文化局推動老厝文化運動計畫,佮有意願的民間企業合作修復老厝。為著莫予老厝的風格佇修復了後走精去,濟濟鋩角攏需要來回協調確認。

廈川玖肆主理人曾士綱:「因為愛符合當初文資委員的期待,阮其實燒非常非常濟的貨樣,去參文資委員討論」。
文化局副局長田瑋:「經營親像藝文中心,進行一寡商業營利,包括咖啡廳、餐酒廳,今仔日開幕的廈川玖肆,是第14棟完成的,這馬當咧進行的,大概猶有20幾棟」。

對這馬開始,修復了後的舊派出所成做餐廳佮藝文空間使用。文化局估計,紲落來3冬內,會有40棟左右的老厝陸續完成修復,重新來參逐家見面。



 

相關新聞

專題|全台敬老金大調查