臺北大橋教會保存清代建築 文化局列歷史建築

台北市大同區的大橋教會,內面有傳教士-馬偕佇清朝時期所起的教堂,文化局前一陣仔也共登錄做歷史建築。文化局表示,教會保存清朝時期用唭里岸石,所疊的牆圍仔,猶有圓拱尖形的窗仔,攏真有文化價值。

大同區大橋教會,保存清朝時代的唭哩岸石外牆。台北市文化局文資小組最近審查同意,共登錄成做歷史建築。

大橋教會牧師魏永慶:「遮早前號做枋隙教會,就是枋隙教會,枋隙教會就是特別的建築物,佇這个所在呈現,彼个時代的建築,基本上就是用唭里岸石去建造,唭里岸石就是彼當,一種貴重的石頭」。


大橋教會表示,中法戰爭過後,劉銘傳撥款賠償,馬偕神父就用這筆經費重起一座石造尖塔教堂,但是建築物大部份已經毀壞,目前只賰這堵大約兩尺長的唭哩岸外牆佮牧師辦公室,是當年教堂的遺構。

大橋教會牧師魏永慶:「目前逐家所看著的,邊仔的這个窗仔,就是彼當時一直保留到這馬的,伊的特色其實就是唭里岸石,然後伊是一層一層按呢疊頂懸,所以相對上,歷史老師也講,這个部份基本上會使,看著伊的厚度,其實是參咱所想的壁的厚度,其實是無仝」。

台北市文化局表示,文資審查委員討論了後,認為有保留的價值,也是當時傳教歷史的重要見證。大橋教會表示,教會這幾冬除了協助弱勢兒童設置社區關懷站,也希望透過文資身份,吸引閣較濟遊客來社區行踏。



 

相關新聞

專題|全台敬老金大調查