臺灣設計展欲開幕 嘉義市府:設計提升產品價值

12/24台灣設計展欲佇嘉義開幕,嘉義市政府今仔日佇市政府舉辦記者會,邀請配合設計展的在地產業,發表轉型的產品包裝,予民眾了解設計對產業價值的提升,會當有啥物幫助。

各種包裝設計甲媠媠的商品,攏是這改台灣設計展,嘉義市政府輔導轉型的在地企業的產品。嘉義市政府13舉辦台灣設計展的開展記者會,現場介紹遮的產品設計佮生活的結合。


經濟部工業局長呂正華:「文化佮設計融合做伙,毋但佮設計融合,閣代入咱的產業,予阮的產業附加價值提升」。

12月24佇嘉義舉辦的台灣設計展,計共有嘉義舊監獄、林鐵製材所佮嘉義文創園區三大展區。目前三个所在攏無閒咧布搭。主館文創園區設計的主題,是拄拄好的精神,希望介紹嘉義這座空間、時間、生活攏拄拄好的城市。

嘉義市長黃敏惠:「佇12月24開始,一直到明年的一月初二,來到這个城市,看這个城市特別的所在,嘛看著台灣設計展展示的能量」。

除了平面的展覽,主辦單位嘛特別結合藝術活動,邀請在地的表演團體阮劇團,佇嘉義市舊城區的一寡景點頭前,用環境劇場來演出,希望予來看展覽的民眾,除了了解嘉義的設計的未來,嘛會當認捌在地深度的文化。



 

相關新聞