貢寮居民寫批反核四 指重紡會危害規个北臺灣

摃仔寮在地居民佮立委喝口號，表達反對核四的立場，嘛提出一封「摃仔寮人寫予每一位台灣人的批」，講核四若是重新啟用，受著危害的毋但是摃仔寮，是規个北台灣。

貢寮鄉真理里里長趙瑞昌：「日本遐爾先進的國家，攏會發生福島事件，日本承擔福島事件，台灣敢承擔會起」。

鹽寮反核自救會前會長吳文通：「如果核四若是遐爾安全，如果經過所有報告的人，核四若是遐爾(安全)，會使發電的時陣，為何伊佇14年前無愛發電，無愛啟動」。

在地居民指出，為著表達立場，欲邀請重啟核四公投的提案人黃士修，到摃仔寮行踏一擺，聽在地居民的心聲。

重啟核四公投領銜人黃士修：「其實在地居民有支持嘛有反對，核能流言終結者拄創辦無幾年，阮就去過摃仔寮，彼場座談會，猶是有一寡摃仔寮在地居民，留落來聽阮講煞，到底核四電廠是毋是安全，核廢料愛按怎處理」。

黃士修表示，摃仔寮居民對核四的看法本來就毋是干焦一種，質疑這馬是受著政黨影響。在地居民指出，公投毋但決定核四是毋是欲啟動，嘛決定台灣敢欲行向非核家園，呼籲逐家愛來關注。