烏魚子產量少.價數起3成 過年需求大.恐驚閣起

嘉義縣飼烏魚的面積欲到200公頃,一年的產量大約有900噸。這陣仔天氣較冷,嘛是布袋佮東石飼烏魚的漁民無閒咧剖烏魚子的時陣;今年的產量比舊年少,烏魚子的價數也較好。

烏魚親像水沖對車斗頂懸瀉落來,嘉義縣布袋的烏魚子當咧大出,貨車載來滿滿的烏魚,工人嘛無閒咧剖烏魚子,毋過今年量較少,所以價數變較懸。

嘉義縣政府漁業科長張建成:「過去兩冬因為烏魚子產地價數較低,所以阮的漁民有較濟轉飼別的魚種的情形,閣加上舊年海洋的烏魚栽較少,所以放的量嘛變少。」

收購烏魚子的業者表示,往年因為價數䆀少人飼,閣受著疫情牽拖,進口的烏魚子減少,造成這馬本土烏魚子的需求提懸,目前生的價數就起3成半左右。

烏魚子收購業者蕭博忠:「往年八兩差不多佇彼个680至700左右,今年920,因為少人飼,所以講價數浮動佇咧三成半。」

一台接一台的貨車,不斷共烏魚送來剖,逐家嘛無閒趕緊來處理。業者講,國內疫情轉和,過年的時間嘛愈來愈倚,伴手佮餐廳對烏魚子的需求可能閣會增加,連帶價數嘛有可能閣再波動。

相關新聞