新竹厝價也起袂停 時力議員促市府抾囤房稅

全臺厝價攏咧起,頂禮拜財政部揣六都佮新竹縣市,開會討論囤房稅了後,傳出桃園和高雄,攏按算宣佈欲搝懸抑是開始抾囤房稅。針對愈來愈懸的厝價,時代力量新竹市黨團,就要求新竹市愛趕緊推動囤房稅。

新起的大樓當咧趕工,新竹縣市這幾年的厝價懸甲會驚人,時代力量新竹市黨團指出,新竹市尤其是東區的平均價數,一冬來已經起十外葩,要求新竹市府應該針對囤房稅進行討論。

時代力量新竹市議員,廖子齊表示:「毋是抾稅,是透過提懸厝宅的持有成本,鼓勵若有濟戶毋是家己蹛的,會使共無人蹛的厝出租,提供予閣較濟人蹛,厝宅才有發揮蹛的功能。」

時力新竹市議員,蔡惠婷表示:「希望新竹市政府會使加緊跤步,推動囤房稅來起社會住宅,予幸福城市才是真正的祝你幸福。」

新竹市因為有科學園區,閣加上起厝成本增加,想欲買厝家己蹛的人,攏喝講已經擋袂牢,市府稅務局表示會閣再研議修正囤房稅。

新竹市稅務局長,李世珍表示:「有關這部份,新竹市會先看其他縣市的做法,阮會閣再研議處理。」

目前新竹市針對毋是家己蹛的厝,是採用單一上低1.5%的房屋稅,議員表示新竹市空厝的數量,有1萬6千外戶,必須愛提出政策,避免空厝傷濟的亂象。

相關新聞

專題|全台敬老金大調查