12/18公投，新竹市是全國唯一會發出5張公投票的所在。是因為有民間團體，做伙發起「啉好水」公投，今仔日嘛來到頭前溪舉辦宣傳，希望新竹市會使定出「廢汙水管理自治條例」，規定工業、醫療事業廢水，愛有專門的管線回收。
發起「啉好水」公投的民間團體佮公民代表，來到新竹縣市交界的頭前溪，宣傳這擺的地方公投案，希望新竹市會使訂廢汙水管理自治條例，規定工業、醫療事業廢水，愛有專門的管線回收。
社區大學全國促進會秘書長，楊志彬表示：「用公投的方式，予閣較濟主管機關，感受著人民的壓力，積極解決問題。」
荒野保護協會新竹分會長，張正敏表示：「咱真重視食安，食物會使進口，水敢有法度進口？所以12月18我徛佇遮呼籲新竹市民，手內的第五張公投票，咱做伙投入這張票，為飲用水的安全，投入美好的未來。」
發起人表示這改的全國性公投，講實在予逐家有淡薄仔混亂，希望會使回歸公民投票真正的意義，尤其是佮人民生活有關連的公投，予政府聽著公民的聲音。
台灣乾淨水行動聯盟理事長，彭桂枝表示：「希望新竹市民，共同訂定廢汙水管理自治條例，針對頭前溪佮相關溪流的廢水佮汙水，進行相關的規定。」
各黨派嘛派人來到現場支持這項公投，表達予民眾啉好水，本來就是政府上基本的責任，照人數規定欲通過啉好水公投，愛有大概9萬票同意。
