調查臺灣高三學生 過3成有家庭暴力創傷經驗

兒童福利聯盟今年針對1千500位高三學生做研究,發見有三成外的學生、佇做囡仔的時,有家庭暴力等等的創傷經驗,其中閣有學生長期受著情緒困擾,有自殺的想法。


個案管理師魏祥娟:「創傷復原諮詢專線你好,敝姓魏」。


兒童福利聯盟新開設創傷知情照護資源中心,針對受著情緒、身體虐待的青少年抑是家長,提供心理治療的窗仔口,因為基金會最近調查,發見真濟學生囡仔較袂向外界求助, 揣學校鬥相共的經驗也無好。

兒福聯盟執行長白麗芳:「譬如講參學校,阮就會提出講,按怎是一个創傷知情的學校,譬如講按怎改變霸凌的處理條例,按怎佇輔導室來調整,予囡仔閣較願意求助」。

兒福聯盟佇疫情期間,透過美國過去發表的囡仔時逆境經驗量表,頭改針對全台灣千外位高三學生做調查,發見有三成的高三學生有創傷經驗,親像父母離婚、暴力等等,根據調查也發現,若是創傷分數較懸,情緒困擾也較懸。


兒福聯盟執行長白麗芳:「只要伊是分數較懸的,伊的情緒困擾也會較懸,伊的心理健康議題也會較懸,譬如講伊憂鬱的比例,抑是伊真緊張感覺會輸別人,甚至阮注意著,大概有三分之一,四分的高分族群,大概三成的囡仔想過欲自殺」。

兒福聯盟表示,雖然對照美國調查結果,4分以上有12.5%,台灣是6%,數字無算懸,毋過這種創傷是會造成心理、疾病等等,這馬設立創傷中心,也希望通做迒專業的結合,予青少年參爸母透過社工師的協助,揣著心內的出口。


 

全台敬老金大調查

相關新聞