臺灣閱讀節12/4起鼓 各地辦表演.展覽鼓勵看冊

國家圖書館逐年12月攏會舉辦臺灣閱讀節,今年12月開始,佇臺灣各地的公共圖書館、學校等等,嘛會舉辦講座、冊展佮表演。

國小學生佇台頂熱情跳舞,為今年的台灣閱讀節開幕。台灣閱讀節佇每年的12月舉辦,透過各種活動推動閱讀。親像舊年有透過表演、講故事、桌仔耍等等活動,結合課綱鼓勵囡仔加看冊。今年閣有線頂徵文,邀請民眾以厝內的料理出發,寫出對家的記持。透過這種方式,予文學會使結合生活經驗。

國立公共資訊圖書館館長劉仲成:「文化是生活的一種。民以食為天、食飯皇帝大,美食就是一種人生。」咱會使看著作家筆下的飲食美學,咱嘛希望透過文字,會使帶動味蕾。」

國家圖書館館長曾淑賢:「阮嘛搭配這幾年來,課綱咧捒的STEAM。過去咱咧看冊的時陣,較注重文學的部份,(STEAM) 希望共科學的物件、數學的物件、藝術的物件,會使佮看冊結合。希望in透過看冊,會使增加這方面的能力。」

教育部表示,這幾年雖然實體冊、有賣較少的情形,但是相對有觀察著,民眾看冊習慣漸漸轉到電子冊,嘛有發見,疫情之下,民眾對看冊猶是誠重視。

教育部終身教育司司長李毓娟:「今年5月雖然疫情升級,但是電子冊的借閱,透過咱超商借閱的通路,其實借閱量攏是有增加的。(疫情之下)逐家對看冊更加看重,嘛是咱精神的糧食。」

12月初4台灣閱讀節就欲起鼓,教育部表示,看冊是真好的終身學習活動,新課綱強調自主學習的能力,看冊就成做真重要的部分,鼓勵大人囡仔攏來培養看冊的興趣。

相關新聞