全國55社區聯合展工藝品 推廣在地特色兼交流
張君豪 / 新竹報導
發布時間：
更新時間：
臺灣工藝社區輔導成果展覽，邀請來自全臺灣55个社區提出在地特色的工藝品，呈現臺灣工藝文化的特色。
小提琴挨出好聽的歌曲，無講毋知這是用水流柴，製作出來的樂器。
屏東縣城鄉藝文交流協會理事長蔣美花：「用阮原住民的語彙，是用山豬的意象做琴頭，後壁有阮的圖騰意象。」
閣有來自台南佳里區的師傅，現場教人按怎用竹仔，製作環保椅仔，連囝仔的搖笱嘛是用竹仔做的。
民眾：「坐起來親像有人體工學的感覺，予人感覺腰攏袂痠。」
竹器工藝老師林河興：「較環保的材料，塑膠嘛毋是無好，毋過塑膠會製作出真濟糞埽。」
台灣工藝社區輔導成果展覽，邀請來自全台灣55个社區，紮來家己家鄉的工藝作品，佇新埔柿染坊展示在地特色成果。
台灣工藝研究發展中心副主任江瑞燐：「社區工藝的商機，予在地特色的工藝品會使予民眾來認捌。」
工藝研發中心表示，透過活動佮技術交流，向望未來各地方工藝，會當相連做伙，而且深入社區，共同幫助閣較濟社區發展在地特色產業。
專題｜改造地獄路 台灣行人路為何難行？
