新竹犯保協會開課 助刑案受害者家屬行出烏影

刑事案件的被害人家屬,毋但心肝艱苦,可能閣愛面臨家庭的經濟負擔。犯罪被害人保護協會有推出一个安心計畫,欲協助家屬行出心內的烏影,重新出發。

提家私雕刻出圖樣,66歲的陳麗美15冬前翁婿發生嚴重車禍,受傷了後䖙佇眠床5年無法度食頭路,厝內閣有2个囝仔愛照顧,家庭經濟雄雄出現困難。好佳哉經過犯保協會的皮件創作課程,伊學會曉這項技術,度過家庭的經濟危機。

馨生人,陳麗美表示:「無論行到佗,我欲去DIY,做啥物攏會使,予咱的家庭,會使變做一個完整的家庭。」

另外一位許先生,牽手因為車禍過身,因為有厝內人佮志工陪伴,透過協會開辦的免費專業課程訓練,學煮咖啡佮製作手工麵包,這馬有固定收入,嘛對悲傷內底行出來。

馨生人,許興爐表示:「發生這款代誌,逐家攏無願意,我相信對方加害人嘛無願意,咱愛去面對 向前行。」

犯罪被害人保護協會董事長,邢泰釗表示:「安心計畫希望in拄著困難的時陣,會使趕緊獨立,這是社會愛心具體的體現。」

犯保協會表示,全台各分會攏有開辦課程,提供車禍等等刑事案件的受害人家屬,包括藝術創作、編織、咖啡製作等等免費訓練,除了協助in佇經濟上會當獨立,嘛鼓勵家屬互相支持,冗早行出失去家人的痛苦。

相關新聞

專題|全台敬老金大調查