有社工被要求薪水著捐予機構 閣用親人名義

社會福利機構要求員工,愛共一部份的薪水捐倒轉去,是捷捷聽著。佇彰化煞發生一層,叫員工用厝內底的人的名義,共錢捐予機構。上班閣愛捐錢? 咱作伙來關心這個現象。

薪資條、佮捐款的收據寫明,一個月兩萬三的薪水,共其中1440箍捐倒轉去。過去社工人員予機構要求回捐薪資、大部份是社工個人捐款轉去機構,但是高雄市社工職業工會最近接著彰化社工投訴,2017年到2018年,有機構要求社工以親人名義共薪水捐轉去。

當事人 VS 社福機構錄音檔(陳椒華委員辦公室提供):「講著回捐的部份應該是個人意願,無 阮協會本來就有規定矣」。

高雄市社會工作人員職業工會秘書長郭志南:「我請當事人去彰化縣勞工處佮社會處,一方面進行勞資調解,另一方面行正式管道,向彰化縣社會處提出申訴,申訴了後完全石沉大海,甚至彰化縣政府發一張公文予我,頂懸寫講這叫做捐款瑕疵」。

彰化縣政府表示,因為薪水的部份,機構攏有正常撥付予當事人,而且捐款紀錄嘛毋是當事人本人,所以才認定是捐款瑕疵,工會批評,這根本就是對機構放目。而且衛福部方面,佮縣政府的看法嘛無仝。

彰化縣政府社會處身障福利科科長林佩宸:「攏有確實撥付薪資,落尾才以捐款的方式予協會」。

衛福部社會救助佮社工司副司長蘇昭如:「伊可能猶是一个薪資回捐的類型,袂使強制,抑是用其他違反員工意願的方式,要求薪資回捐,用家屬的名義,廣義來講是包含佇內面」。

彰化縣政府表示,雙方已經以5萬箍和解,縣政府嘛會佇機構評鑑的時陣共扣分,機構一年會因此減10萬箍左右的補助款。衛福部表示,明年會有閣較嚴格的法律規定,若是有查著回捐的情形,就會完全停止補助一年。

 

九合一選舉指南

相關新聞