"轉去判決彼一日"藝術展 說人權迫害烏暗年代

政治受難者-陳武鎮,本身也是藝術家,受著文化部長的邀請,共40件有關國家機器,迫害人權的藝術品,囥佇中正紀念堂內面展示。中正紀念堂管理處也肯定這是空間解嚴、轉型正義的大進步。

陳武鎮"轉去判決彼一日"藝術展:「我的天空,干焦鐵窗的大細」。

講家己20歲因為叛亂罪入獄、不見天日的心聲,一个一个坎坷的面容頂頭,貼蔣介石親手寫的「槍決可也」批示,欲控訴對威權政權的不公不義。政治受難者陳武鎮這場號做「轉去判決彼一日」藝術展,這陣就佇中正紀念堂展示。

藝術家陳武鎮:「較想嘛想袂到講,我的作品會佇遮展覽,這是文化部部長伊的意思,真意外 真有意思,因為這是一个我需要抗議的所在,我用我抗議的作品來遮抗議」。

用塗水師傅咧用的抹刀,大力共對當權者作賊心虛、壓迫人心和肉體的不滿抹出來。陳武鎮講伊關兩年出來,受情治單位監控數十年,到1992年刑法一百條廢除以後,才通安心發揮伊對兒童美術的熱愛。

藝術家陳武鎮:「等30外冬,刑法一百條廢除了,彼个時陣黨外運動以後,彼个社會氣氛,攏予我感覺我會使開始,製作我想欲製作的美術品」。

這工的展覽區蓋鬧熱,有促轉會邀請的小學生、猶閣有台語母語團和政治受難者前輩攏來看展。

看展民眾:「這是台灣的歷史,台灣當然毋是干焦講台語的人,所有人我攏希望逐家會使用家己的母語,去了解家己土地發生的代誌」。

促轉會代理主任委員葉虹靈:「佇監獄生活無人道的待遇,這寡內容有史以來,頭一改進入堂廳裡面展出,阮感覺有相當的意義」。

中正紀念堂管理處也肯定這場展覽是空間解嚴、轉型正義的一大步,紲落來會規畫典藏和永久展示。


 

全台敬老金大調查

相關新聞