"228消失的政黨"出版 說當時組織佮民運過程
鄭雅文 林郁凱 / 台北報導
發布時間：
更新時間：
蔣渭水所創立的台灣民眾黨，佇日本時代結束了後轉做台灣省政治建設協會，仝款想欲推動政治改革，想袂到猶是受著228事件的影響。臺北的二二八紀念館這馬出版專冊，欲紹介這个消失的政黨。
冊名228消失的政黨－台灣省政治建設協會，紹介自日本時代台灣民眾黨延伸的民間組織。
二二八研究者黃惠君：「二次世界大戰結束，這个時陣IN當然期待脫離日本統治了後，會當有新的政治參與的機會，希望通閣再出發建設新台灣；但是想袂到講當時的政府，其實是無允准台灣人組黨的。」
雖然當局禁止組黨，毋過IN猶是以全台組織化做目標，成立25个地方分會，而且閣以中華民國憲法通過為轉機 ，推動縣市長直接民選，追求改變官派、貪汙的統治，是台灣民眾運動的重要歷程，二二八紀念館這改出版這本專冊，也特別用政黨來共稱呼。
二二八研究者黃惠君：「要求縣市長普選，伊毋是意見領袖的意見爾爾。伊也毋是32條要求當中的其中一條爾爾，伊是當時有一个政黨，而且起自日本時代的台灣民眾黨，甚至當時的自治運動團體參解放運動團體，像農民組合等等，甚至台灣共產黨盡全力落去要求的。」
台灣省政治建設協會當時也積極參與二二八事件處理委員會，雖然佇二二八鎮壓後，協會幹部予處死抑是通緝，毋過像彼陣的告同胞書，講著改革原則等等，看會出彼當時智識人的期盼參精神，這陣也收藏佇二二八館場中。
專題｜改造地獄路 台灣行人路為何難行？
