全臺起上濟 新竹第2季平均厝價比舊年加192萬

根據銀行鑑價資料顯示,今年第2季全台灣厝價起上濟的所在,是佇咧新竹縣的竹北市。房地產成交的平均價數,佮舊年比較竟然加192萬,就是講舊年無買的民眾,今年愛加開192萬才買會著。

新起的大樓當咧施工,另外一爿吊車嘛誠無閒。 新竹縣竹北市是今年第二季銀行鑑價統計資料內底,全台灣厝價起上濟的所在,想欲買厝愛比舊年加攢192萬,民眾講實在買袂起。

竹北市民:「逐家攏講這馬無買,厝就會直直起價,用這款話叫逐家買厝,身軀邊的序大攏會按呢講,事實上嘛是按呢,厝價就是一直起」。

竹北市民:「買厝的時間點,無買可能無偌久,厝就賣了矣,一兩個月過去想欲去買,當咧考慮的時陣,厝就已經賣去矣」。

專門做房屋買賣的中人指出,竹北這幾年有真濟新起的建案,厝會起價除了因為科學園區的關係,上重要的是起厝的成本增加。

房仲業者黃俊富:「建材成本佮人工成本攏起價矣,所以共價數算來消費者身上,閣來就是新竹佮竹北,已經無所在會使開發,所以這馬變做無所在通好起厝」。

除了新竹縣,第二名的台北市平均嘛愛加開184萬,第三名的嘉義是70外萬,民眾想欲買厝,實在愈來愈無簡單。

 

全台敬老金大調查

相關新聞