新竹鼓勵檳榔農民改種油茶 提煉茶油拚銷路
張君豪 / 新竹報導
發布時間：
更新時間：
農糧署佮新竹縣政府為著鼓勵農民莫種檳榔，改種油茶樹，除了透過補助、鼓勵農民申請，嘛利用農友團體佮技術單位合作，希望農民通家己加工、櫼茶油，連行銷的通路也經營，嘛較符合健康養生的趨勢。
一粒一粒看起來真古錐的樹子，就是對油茶樹挽落來的，佇農友細膩照顧之下，每一欉油茶樹生了誠好。今年因為氣候穩定，茶油產量佮品質攏袂䆀，農民一年的辛苦算是提著回報。
油茶農友表示：「其實算袂歹種，愛用心來顧。」
新竹縣湖口油茶產銷班長，黃健二表示：「無風颱嘛無災害，今年蟲害嘛無，所以今年產量是誠好。」
農糧署這幾年鼓勵農民加種寡油茶，透過輔導，希望逐家毋干焦種爾，紲落來閣通家己加工提煉茶油，兼經營銷售通路。
農糧署主任秘書，陳啟榮表示：「共種檳榔改換種油茶樹，逐公頃15萬箍的補助，另外種苗抑是管理的部份，閣加疊5萬箍，提供誠好的轉作鼓勵。」
目前新竹縣種油茶樹的面積有92公頃，為著鼓勵農民種油茶，嘛透過補助來減輕油茶初期無收益的經濟負擔，希望推廣油茶產業發展。
2022杭州亞運 台灣百金之路
