工地附近抱走別人囡仔 工人講是安全顧慮

蹛新竹的民眾,最近攏會收著一篇網路文章,內容是寫講「有生份人會佇社區大樓附近,烏白共囡仔抱走。」引起民眾驚惶,經過警方調查才發現,原來是附近工地咧施工,工人驚囡仔危險,才會想欲抱起來。這个行為煞引起家長的誤會。

一篇社區大樓的公告,引起竹北地區家長的驚惶,對電眼的畫面會當看著,這位媽媽準備𤆬囡仔過路口,工人來到面頭前敢若想欲倚磕囡仔,媽媽驚甲連鞭共囡仔抱起來,這名工人的行為嘛引起在地民眾討論。

其他家長表示:「看會出來無歹意,毋過若是真正磕著囡仔,嘛是會緊張。」

附近工地人員表示:「阮工人干焦會使徛佇頭前引導,毋知影為啥物他會共囡仔抱起來。」

派出所接著通報,隨來社區大樓了解狀況,當日暗時嘛通知工人到案說明,才發現原來是誤會一場。」

新竹縣六家派出所長,胡淙惟表示:「附近有施工當咧進行交通管制,當時現場一名男性工人,佇工地進行出入管制,當事者佮囡仔經過遮,工人雄雄徛近,無經過家長同意,考量囡仔安全,就共囡仔抱起來。」

雖然講工人是好意,猶毋過因為無經過家長同意就抱囡仔,有涉嫌強制罪的疑慮,目前警方猶是將工人移送新竹地檢署偵辦。

全台敬老金大調查

相關新聞