企業.民團添資源 嘉義偏鄉國小推科技.音樂課

嘉義縣山區佮海區,路頭遙遠的學校,因為所在遠,讀冊的人數閣無夠濟,所以課本以外的教育資源會較欠缺,這馬有一寡企業佮民間單位,佇偏鄉的學校推廣課程計畫,希望增加囡仔學習的機會佮空間。

學生囡仔用手電仔,予食太陽能的機器人會振動,除了太陽能的運用,閣有電腦程式、虛擬實境的課程。嘉義縣偏遠學校的囡仔,誠期待會當上著遮的課程。

嘉義縣溪口國小,張同學表示:「會當做這種實驗閣是第一改做,感覺對遮的閣誠有興趣,就是家已體驗動手來做看覓。」

嘉義縣溪口國小校長,陳媺慈表示:「無仝教學領域的加入,嘛予咱老師教學的範圍會當閣較闊,囡仔的學習嘛閣較豐富。」

透過教育部佮嘉義縣政府的協助,幾若个科技企業佮文教基金會,做伙佇嘉義縣14間國小,推動科技佮古典音樂的教育計畫,希望透過教育資源的提供,照顧偏鄉國小的學生。

嘉義縣太平國小校長,黃彥鈞表示:「學校佇咧較偏遠的山區,囡仔平常時會當接觸的物件,毋是遐爾仔濟,透過參與這項計畫,對囡仔學習的一寡智識佮見解,有誠大的幫助。」

教育處表示,推動遮的課程計畫的企業佮文教基金會,對2009年到今投入的資源愈來愈豐富,吸引誠濟學校欲來參加,這改甄選出來的14間國小,攏希望透過這改的機會,增加學校的資源,替偏鄉的囡仔提供閣較好的學習環境。

全台敬老金大調查

相關新聞