嘉義大身人工藝師 拍拚對抗進口挑戰傳手工

嘉義縣水上,有一間專門做神將、大身尪仔身軀枝骨仔的工作室,目前第四代的師傅也講,這超過百年的工藝毋但愛共保存,IN嘛愛來進步,才會當佮中國貨捙拚。

一刀一刀,共竹仔剾甲欲愛的厚度,紲落來閣愛用火那烘那拗,做大身尪仔枝骨的師傅講,手工製造的大身尪仔較有彈力質,揹起來較四序。

大身尪仔師傅 施勝騰指出:「這馬大多數攏是中國入來的。中國入來的竹仔攏是機器削的,IN的寸尺、厚度攏是仝款的。這馬機器做的,規仙攏tīng硞硞,應該有的彈性IN攏無出來」

嘉義縣水上這間大身尪仔的工作室,到今已經有百外冬的歷史,第四代的師傅講,一身尪仔做起來上少愛2、3天,加上閣愛開真濟功夫,所以手工的大身尪仔這馬是愈來愈少矣。

施勝騰表示:「以台灣這馬閣有咧手工做的,應該賰兩間爾。像咱按呢規枝的竹仔,先落去量寸尺,量咱欲愛的寸尺再落去剪,剪剪咧竹仔這表面的垃圾攏愛洗起來,然後才有落去剖講咱欲愛的偌大板。然後落去破,才落去削,閣來落去拗圓箍仔,沓沓仔共鎖起來」

工作室表示,頂一陣因為疫情,廟寺閣無啥咧鬧熱,大身尪仔的訂單加減有受影響,雖然捌有人揣IN做尪仔冊內底的角色,毋過IN猶是希望會當佇傳統宗教文化的範圍內底,繼續來保存這項竹製枝骨的工藝技術。

相關新聞

專題|全台敬老金大調查