校園幸福列車上偏鄉 贊助加菜金.請食石踞丸

「好食無？好食。」

第一改食著章魚燒這種物仔，茶山國小的學生，逐家攏食共誠歡喜。成立三冬外的校園幸福列車，專門提供資源予雲嘉南的偏鄉學校，這改𪜶來到阿里山的茶山佮山美兩間國小，閣替囡仔攢章魚燒。

嘉義縣茶山國小老師表示：「學生知影𪜶欲來的時陣，就真歡喜嘛誠期待，會當拜五趕緊到，想欲知影欲食啥，囡仔攏誠期待，逐工攏咧問。」

來自社區佮民間的善心人士，為著照顧偏鄉的學生，三冬來已經去過將近70間偏鄉的學校，講故事予囡仔聽，嘛替學校加菜，閣會邀請點心擔仔，予囡仔會當食一寡平常較罕得食著的物件。

嘉義縣阿里山鄉茶山國小校長，鄭佩茜表示：「一般來講遮的路途較遠，所以其實外口的資源佮關心，當然嘛無法度，參別間學校仝款遐爾仔豐富。」

校園幸福列車長 翁榮輝表示：「除了關心囡仔以外，嘛愛教遮的囡仔，以後大漢若有能力，希望會當回饋社會做善事。」

幸福列車的人士表示，這是𪜶三冬以來，第一改來到這間偏遠的學校，雖然路途誠遠，但是看著學生準備表演，佮𪜶歡喜的表情，攏感覺誠有價值，嘛希望社會上有能力的企業，會當加關心偏遠學校，予囡仔有閣較好的教育資源。