新竹1私幼煏超收.虐待 議員告縣府圖利.掩護
張君豪 / 新竹報導
發布時間：
更新時間：
目次
新竹縣竹北市這幾年紅嬰仔的出生率，佇臺灣算頭崁。議員接著真濟家長陳情，講有一个幼稚園集團，毋但學生收超過，甚至閣傳出有無牌的老師tshuā囡仔的問題。
想著家己的囡仔，佇幼兒園受著不當管教，家長毋甘咧流目屎，新竹縣議員指出，這間幼稚園逐年超收囡仔超過150人，上濟有到205人，超收的情形實在有夠離譜。
家長表示：「新竹縣的公幼嚴重無夠，阮真濟攏是抽袂著，所以不得已，共囡仔送去私人的幼稚園，毋過出代誌是無人會使鬥相共」
新竹縣議員(綠黨) 余筱菁指出：「去查年歲的階層，會發見每一个階層攏超收，超收的囡仔有可能藉口托嬰，抑是別單位 三間幼稚園任意應用。其實新竹縣上嚴重的，就是真濟私幼是集團式經營」
議員講縣政府毋但無主動對幼兒園稽查家長檢舉的事件，顛倒頭竟然要求家長提出證據，所以決定欲對縣政府提出告訴。
新竹縣教育處副處長 蔡淑貞表示：「幼稚園稽查的部份，除了平常時的公共安全檢查佮相關的評鑑，阮會加強人員無定期抽查，避免幼稚園有超收的情形」
縣政府回應，針對超收學生的部份，未來會加強無定期稽查，若是發現無依照規定，一定會嚴格處罰，絕對無包庇業者的代誌。
2022杭州亞運 台灣百金之路
