熱蘭遮城西牆圍.排水基礎出土 考古重大發現

臺灣上早的城池,是1624年,荷蘭人佇臺南安平古堡起的熱蘭遮城,2024年臺南欲迎接建城400年,成功大學進行真濟熱蘭遮城的考古研究,in最近挖出熱蘭遮城西爿的外牆佮排水系統,過去歷史資料攏無記錄,是重要的發現。

安平古堡邊仔,考古人員佇塗跤兩公尺所在,挖著磚仔壁,這是掩佇咧塗跤的熱蘭遮城遺跡。

考古人員講:「上大的發現是佇西牆城外,揣著排水道」

台南市文資處委託成大,進行熱蘭遮城的考古,in頭擺看著西城外牆佮房厝的基礎,上特別的是閣有排水道,較早的史料攏無記錄。

成功大學考古研究所所長 劉益昌表示:「從來無任何學者抑是研究者知影,這个所在有一个排水溝,熱蘭遮城是起佇一个沙崙較懸的所在,照理講排水應該是無問題,毋過伊為啥物猶是愛排水,臺南猶是會落大雨」

1624年荷蘭人來台,佇這馬的安平古堡起熱蘭遮城,這馬干焦賰古堡內底的這堵壁,閣有十幾冬前挖出來的遺跡,為著台南建城400年,最近兩冬,市府佮成大開始熱蘭遮城佮附近大員市鎮的調查,in根據這份佇荷蘭揣著的地籍冊,佮現代地籍圖套圖,描繪出規个城堡的範圍。

臺南市文資處長 林喬彬指出:「佇石門國小遐挖兩个所在,嘛有佇劍獅埕挖一个所在,其實攏有發見一寡清朝的時陣,包括一寡海岸邊構造物痕跡」

負責的劉益昌教授,希望共這一段一段的遺跡接起來,了解熱蘭遮城確實的位置,紲落來佇圖面復原,因為這座城是台灣歷史發展的關鍵。

成功大學考古研究所所長 劉益昌表示:「咱現在是一个以世界貿易體系,做為咱生活條件的國家,咱按怎會行入這个世界貿易體系,基本上遮是頭一步」

文資處拄提著中央505萬經費,拍算欲佇北爿外牆挖落去,繼續這个計畫的調查,予民眾更加了解熱蘭遮城的歷史佮故事。

全台敬老金大調查

相關新聞