司法影展放6齣著獎的電影 促大眾思考
郭柏均 張育睿 / 臺北報導
發布時間：
更新時間：
金馬影展對2019年開始佮司法院合作，推出的「司法影展」。這改有6齣電影，包含兒童問題、性暴力的議題，希望觀眾會當了解著司法制度佮社會價值觀。
電影該死的阿修羅片段：「敢若所有代誌攏有一條線，我迒過，就是刁工的。」。
發生佇夜市仔內底的隨機殺人事件，《該死的阿修羅》這齣，表面上是以殺人事件做主題的電影，實際牽涉著教育、媒體等等的問題，範圍是真闊，入選2021司法影展參展電影。
金馬執委會執行長聞天祥：「牽涉包括少年人教育，家庭管理的問題，媒體報導站節的問題，遮的問題其實攏有可能，佮法律有關係，電影對我來講較平等的觀點來看待事件，自然就會佮咱的生活產生關聯。」。
司法院今年是第三擺佮金馬影展執行委員會合作，辦理司法影展，希望透過電影放送，會當予民眾認捌日常生活當中，可能接觸著的各種法律議題，搝近民眾佮司法的距離。
司法院長許宗力：「咱法律人嘛透過司法影展，更加了解人民對法律的了解，這嘛幫助司法判決更加精確，袂離社會多數民眾的感情傷遠。」。
司法影展選出6齣電影，佇台北金馬影展的「罪佮罰」單元播出，嘛會佇中南部放送。部分場次有法律人士的座談會，tshuā領民眾認捌電影當中的議題，嘛予觀眾提出家己的想法，做伙討論。
專題｜改造地獄路 台灣行人路為何難行？
