新竹市連紲10日光影藝術節 照光古蹟展風華

新竹市對今仔日開始,連紲10工舉辦藝術節的活動,用光影、燈火,拍佇有歷史的建築物,親像教堂、公賣局、博物館這寡仔古蹟頂懸,實在光焱焱、媠噹噹。

美麗的光影投射佇有85年歷史的新竹公賣局,配合音樂展現出無仝款的古蹟氣氛。閣用動畫故事,予民眾了解古蹟過去的歷史。

民眾表示:「光線配搭音樂其實誠震撼,然後其實看到一半真正會起雞母皮。」

創作總策展人,林長叡表示:「阮希望民眾會使透過動畫,了解早期電影的文化,佇這內底阮嘛邀請繪畫師,較早有手繪的老師,特別為這閣再創造。」

一百組藝術團隊佮志工,用一年時間設計準備,佇新竹市九座古蹟建築物,用光影連結音樂,講台灣和新竹的故事。

創作團隊,陳良璣表示:「予逐家會使清楚知影,這以早是公賣局的建築物,所以共科技參古蹟,做一擺較無仝款的結合。」

藝術節活動對22開始到10月底,逐暗6點開始演出,用現代科技共歷史古蹟重新呈現佇民眾面頭前。

全台敬老金大調查