臺北228紀念館辦畫展 "肉身殉難"說歷史傷痕
郭柏均 張育睿 / 臺北報導
發布時間：
更新時間：
臺北二二八紀念館當咧舉辦「肉身殉難」的畫展，畫家江懿亨用畫作佮裝置藝術，展現二二八事件當中的悲傷佮遺憾。
下跪的人，無助的模樣，邊仔有火星飛過。另一爿的畫作，人倒咧塗跤，目睭瞌瞌，濟濟作品展現出228事件當中，受難者的無奈。
畫家，江懿亨表示：「內容是接近象徵主義的，暗示性的，有一寡人予屠殺了後，漂到海岸邊仔，我共彼的模樣留落來，表現彼當陣的無奈、悲哀，遠方有一寡仔月光、一點希望。」
猶閣有這个畫佇屜仔內底的裝置藝術，江懿亨講，這个作品是對家屬整理受難者的房間，發現遺書的故事去發想的。
畫家，江懿亨表示：「我創作大概是對1985年開始，彼个時陣大概是台灣的社會運動拄開始，民主運動拄開始的時陣，彼段時間台灣有真濟青年，因為國民黨遷台，佇彼段環境內底，𪜶對台灣人的無了解，產生一个真大的差距，屠殺的行為。」
展覽對10月22開始、到12月12，34件畫作、2件裝置藝術，佇台北二二八紀念館展出。江懿亨講，希望來看展覽的民眾，會使對作品內底得著救贖，嘛愛共歷史記予牢。
專題｜改造地獄路 台灣行人路為何難行？
