兒福盟:疫情致網路霸凌增加 倚8成囡仔有感覺

一幅一幅插圖，畫出予人霸凌的疼，根據兒童福利聯盟的統計，今年國中、高中的囡仔使用網路的時間一禮拜超過40點鐘，比舊年的27.2點鐘 家真濟，致使網路霸凌的狀況嘛增加，有78.8%的囡仔認為情形誠嚴重。

兒童福利聯盟執行長白麗芳：「大概五个囡仔內底就有一个捌受過網路霸凌的事件。咱嘛發現囡仔受著網路霸凌，實際的落差就是，八成的囡仔感覺家己受著網路霸凌會向師長尋求幫助，但是實際發生的時，只有大概兩成的囡仔向師長求助。以前佇師資培育的過程，老師並無處理囡仔糾紛的專長佮輔導的技巧。」

聯盟認為，教育部應該愛提懸教育現場第一線的老師，面對囡仔之間發生糾紛事件的處理能力。聯盟方面，這馬推出「我想欲聽你講」line口座，向望會使佇第一線協助囡仔。

兒童福利聯盟執行長白麗芳：「因為囡仔嘛需要清楚伊拄著啥，伊可能會使處理的方式是啥；可能阮就毋是隨予伊具體的建議，是會陪囡仔講看覓伊拄著啥，閣再陪伊揣可能的幫助。譬如講伊身軀邊有啥物友善的人會使先提供協助，抑是正式向學校、教育部提出一寡申請。」

聯盟今年閣再邀請藝人炎亞綸，擔任反霸凌愛心大使。炎亞綸嘛佇現場分享家己過去予人霸凌的經驗，呼籲有仝款狀況的少年人愛勇敢徛出來，為家己發聲。