鳳農市仔夆烏白擲糞埽 環保局3工告發25件

高雄鳳農果菜市場後壁的車路,定定有人偷倒糞埽,真濟停車格的糞埽、囤規堆,環保局連紲三工派人取締,告發25件,清潔隊員嘛表示,遮逐工摒的糞埽差不多有五噸,攏是果菜市場工作人員佮附近民眾烏白擲的。

一个騎oo-tóo-bái的人欲烏白擲糞埽,當場予環保局人員㨑著。

民眾:「這擺原諒我,我毋是故意的,我袂閣烏白擲矣。」

毋但伊,半暝嘛有人專工駛車來遮擲一包糞埽,甚至是出動貨車來偷倒,這幾工環保局佇鳳農市場後壁的車路錄影取締,因為遮的停車格,定定有糞埽鎮甲一堆一堆若糞埽場仝款,有當時仔糞埽擲佇兩台車中央,予逐工來摒掃的清潔人員是真受氣。

清潔隊員:「無一工改善,逐工攏按呢,這陣清了後,等一下十二點外閣有人來擲矣。」另外一个清潔隊員表示:「菜葉仔佮果子,遮的物件哪會走出來外口,敢毋是你市場咧管理的,你欲予伊場外交易的時陣,你影響阮做工課,我一工五噸車,逐工攏載甲滇滇滇。」

鳳農市場表示,市場內底有提供糞埽處理場,逐工清運,𪜶有咧管理,毋過糞埽烏白擲的情形愈來愈嚴重,環保局連紲三工取締,告發25件。

高雄市環保局科長蘇皇信表示:「有派人無定期現場取締,佇現場取締違法,真濟是鳳農市場咧做工課的,佮附近一般的住戶。」

一張單會當罰千二至六千,恐驚罰無幾工,就閣有人來擲,清潔人員建議愛罰較重才有效。

 

全台敬老金大調查

相關新聞