高雄無管委會舊住商大樓34棟 陳其邁下令清查

高雄城中城大樓的火厄,引起逐家注意舊大樓的消防問題,高雄市長陳其邁下令,稽查市內34棟無管理委員會的,商業徛家混合大樓。今仔下晡市府相關單位,就查著鹽埕區2棟40年以上大樓,有霧水系統各樣、防火門關袂起來的消防問題。

來到鹽埕這棟超過四十年的大樓,對電梯行出來,電火真暗,有的天篷已經塌落來,遮一間一間攏是套房,真濟已經無人蹛。

這棟大樓原本兩百外戶,這馬賰二十戶,大部分是獨居,大樓因為無收管理費,是靠基地台租金來維持。主委表示,大樓雖然真舊,遮基本消防設施攏有,逐年嘛通過檢查,毋過聽著城中城大火,嘛會緊張。

大樓主委,孫麗英表示:「真緊張,真緊張啊。住戶部份這兩工有要求,電線傷舊的,延長線愛換。」

主委講,其實伊嘛想欲都更,毋過大樓產權複雜,七年後台鹽就欲收回,佇鹽埕區親像這款超過三十年的大樓袂少,舊公寓嘛真濟。根據統計,高雄市超過三十年老厝攏總有56萬棟,議員批評,市府對城中城這款危險老厝的安全無管理,應該愛全面清查。

高雄市議員,陳美雅表示:「假使因為現行法律,無法度去行法律程序,有效去協助,這種未爆彈佇高雄閣有偌濟。」

高雄市長,陳其邁表示:「這馬阮列管超過30年以上,屬於無管委會的,住商混合大樓攏總有34座,昨昏要求工務局、消防局、警察局,必要的時陣提供協助,愛佇3工內完成全面體檢。」

除了針對無管委會的大樓體檢,都發局表示,in這馬會增加都更工作站,協助住戶改建老厝。

相關新聞

專題|全台敬老金大調查