嘉義大埔和平村 大水柴做小提琴.藝術推觀光

曾文水庫邊的嘉義縣大埔鄉,除了有優美的風景發展觀光,大埔鄉的和平村嘛利用大水柴製作小提琴,吸引袂少人來遮參觀學習。

提小提琴來試聲音,邊仔閣有社區民眾當咧無閒製琴,嘉義縣大埔鄉的遊客中心,逐禮拜攏固定有製作小提琴的免費課程通學,社區的序大毋但會曉攑鋤頭,閣會曉做小提琴。

大埔鄉和平村民,吳女士表示:「做做咧就予𪜶去挨,看孫仔共咱挨琴,是不是會誠有成就感,阮嘛會曉做琴。」

小提琴製琴師,黃聖彥表示:「這是攏規塊落下挖的,頂面上厚的所在,只有三點一厘米,三點一厘米就是0.31公分,背板上厚的部份,只有0.42公分。」

大埔鄉民目前主要的收入,攏是倚靠曾文水庫的觀光,鄉公所嘛配合水庫的自然環境推出各種行程。和平村長表示,in毋但製琴,嘛成立絃樂團,希望配合水庫的風景,打造自然佮藝術的在地特色。

大埔鄉和平村長,吳倚豪表示:「學習來做提琴,不管是小提琴猶是大提琴,這个部份我是未來欲成立一个博物館,屬於咱在地的博物館,予遊客來這个所在就是講,咱這个所在其實伊嘛真有一个深度。」

社區除了利用大水柴來製琴,嘛捌用過竹仔、洗衫板等等的材料,而且有的人閣會佇琴身做藝術創作,製琴的老師講,和平村的小提琴毋但幫助推展觀光,嘛替這个偏鄉社區,創造在地的藝術工藝。

全台敬老金大調查

相關新聞