大埔國中小顯微課程 手機裝特殊鏡頭看世界
林緯廷 / 嘉義報導
發布時間：
更新時間：
嘉義大埔的大埔國中小，全校只有85名學生，學校配合「微觀實驗課程」，學生毋免使用傳統的譀鏡，用一般的平板電腦抑是手機仔的鏡頭，就會當來觀察物件頂面幼路的所在。
共特殊的鏡頭鬥佇咧平板電腦頂懸，學生毋免用譀鏡，嘛看會著一寡物仔微細的紋路，推捒行動顯微鏡科學教育的老師講，這種課程大學生嘛無一定學會著。
課程講師，林建明表示：「一般來講大學生攏無一定會接觸著，𪜶通常是佇研究所，佇工程科技領域，𪜶可能才會去研究，這種比較物理、化學、生物，甚至工程微觀的世界。」
嘉義縣大埔國中小，黃同學表示：「誠厲害，就誠新奇，伊會當看著誠微細的物件。」
佇曾文水庫邊仔的大埔鄉，因為所在偏僻，鄉內的囡仔差不多攏佇這間學校讀冊，而且嘛因為偏鄉的資源較無夠，所以一寡仔設備猶是建設，嘛拄著問題。
嘉義縣大埔國中小校長，林子欽表示：「特別是國中的課程，有一寡仔愛用譀鏡，學校基本上譀鏡攏較欠缺，像阮學校欲用譀鏡，閣愛特別到竹崎高中，去共𪜶借來用。」
嘉義縣大埔國中小，洪同學表示：「較早是上實驗課程的時陣，有當時會欠一寡仔器材，這馬情況有較好矣，但是嘛是閣有欠缺，希望以後會當有閣較濟的設備，方便阮來上課使用。」
有這項顯微的設備，學生以後毋管是欲看植物，抑是蟲豸，攏會當方便來使用，大埔國中小表示，IN會繼續爭取資源，照顧鄉內囡仔的學習權利。
專題｜改造地獄路 台灣行人路為何難行？
