南港新服務據點 專門替55歲以上民眾揣頭路

台北市勞動局10/12佇南港成立「銀髮人才服務據點」,專門替55歲以上的民眾揣頭路。親像一寡散賣、餐飲等等的行業,未來嘛希望會當開發閣較濟的工課名額,協助中高齡的失業者揣著新新頭路。

專門替55歲以上抑是退休後閣欲揣頭路的民眾,媒合工課的銀髮人才服務據點正式啟用,有序大馬上就來添單。

民眾講,「假使退休了後無咧做代誌,身體馬上就會害去。」

為著莫予高齡者脫離社區,台北市勞動局特別揣業者提供工課,目前有一寡仔零售、餐飲業攏有欠人,大部份是算點鐘的,希望有歲的求職者,也通加減趁一寡所費,抑是有代誌做,補充社區的勞動力。

北市勞動局長 陳信瑜講,「阮會去揣出新形態的一寡算點鐘的頭路,其實也算新勞工去開創新職缺來投入,台灣紲落來因為少子化佮老人化的狀況,勞動市場空洞化就通補足。」

北市勞動局也表示,為著倚近高齡者的需求,據點內底的業務輔導員也用中高齡者,這嘛算是北台灣頭一个銀髮求職據點,希望佇今年底進前通媒合成功300人次,未來也會看成效決定是毋是閣增設據點。

 

相關新聞

專題|全台敬老金大調查