台積電設廠致厝價起 高雄按起8800戶社宅出租
陳嘉筠 賴威佐 / 高雄報導
發布時間：
更新時間：
有風聲講台積電欲來設廠，最近高雄的厝價攏起矣。毋過高雄市這馬按算欲起8千8百戶的社會住宅，希望共少年人留踮在地。
岡山大鵬九村這塊重劃地，就是未來欲起社會住宅的所在，高雄市長陳其邁，視察岡山社會住宅的基地，最近北高雄的厝價因為台積電欲設廠的消息，攏提懸矣，連岡山嘛受影響。
岡山區後紅里長，余清財表示：「地價並兩冬前，差不多起三成外，較早若一間厝一千萬買會著，這馬攏愛千五、千六，平均差不多三成以上。」
里長講，地方會當發展真歡迎，毋過厝價若懸，少年人買袂起，針對高雄厝價愈來愈懸，市長陳其邁表示，相關單位會去查核敢有炒作，配合科學園區，嘛會提供社會住宅佮平價住宅。
高雄市長，陳其邁表示：「社會住宅興建，是為著欲提供租金較低的住宅，另方面嘛會利用平價住宅，阮嘛有窮一寡所在。」
岡山這个社會住宅，年底動工，按算欲起764戶，干焦會當租，袂當買，租金部份，弱勢戶是市價的五、六折，一般戶拍八折，除了岡山，目前苓雅嘛有245戶的社會住宅，按算明年完工，高雄市府目標是起八千八百戶社會住宅，希望替地方共少年人留落來。
2022杭州亞運 台灣百金之路
