因疫情延期閣傷倚明年 2021臺灣燈會主燈取消

原本年初欲辦的2021台灣燈會,受疫情影響停辦了後,觀光局原底按算欲共主燈「乘風逐光」徙來高鐵新竹站頭前展出,毋過考慮著離明年的燈會的時間傷徛,確定取消。

用108枝竹仔展現出風的感覺,搭配新竹出名的玻璃材料,打造高科技未來感,這是2021台灣燈會的主燈,今年初的燈會因為疫情取消,原本6月欲展出又閣延後,這馬已經確定,今年的主燈無法度佮逐家見面矣。

新竹縣交旅處長 游志祥講,「因為疫情的關係,原本阮建議徙到年底,毋過觀光局考量離明年燈會的時間傷過近,建議十月初十進前舉行,縣府考慮著疫情的發展,所以最後只好取消燈會。」
 

主燈主辦單位幾若個月前就配合主燈完成,現場的基座佮電力設備,因為主燈確定取消,嘛只好直接拆除。

新竹縣交旅處長 游志祥講,「電力的線路佮搝線的部份,連變電箱攏已經架設好勢矣,因為疫情關係臨時暫停設施的部份,紲落來會依照地主鐵路局的要求,來辦理清除的工課。」

主燈燈具的部份目前是囥踮觀光局北部倉庫內底,紲落去才閣由觀光局決定用啥物款的方式展出。


 

相關新聞

專題|全台敬老金大調查