畫家出版漁業尪仔冊 用趣味方式推廣養殖智識

嘉義縣有一位畫尪仔冊的畫家,因為家己愛食魚仔,所以用回鄉青年飼虱目魚的故事,畫出臺灣第一套用漁業做主題的尪仔冊。畫家表示,希望透過笑詼的故事予逐家輕鬆看,內容嘛有養殖的智識,趁機會了解漁業環境。

專心佇電腦頂面畫圖,這一張一張的尪仔圖,是咧講北部青年轉來嘉義沿海飼虱目魚的故事。作者開冬半的時間,對飼魚仔開始調查學習,那學那畫,畫出趣味的漁業產業。

作者,蛙奈子表示:「讀者看了以後會感覺真輕鬆趣味,嘛會當學習著一寡養殖的智識,閣有咱台灣水產發展的情況。」

因為愛吃魚仔,才想欲來畫漁業的故事,但是欲了解這个環境,干焦愛食魚仔閣無夠,所以伊定定來到東石佮布袋訪問漁民,想欲共漁業拄著的問題佮智識,完整畫出來。

漁民,蔡恭和講:「用尪仔冊展現出來,會予少年人比較想欲了解這件代誌,或者是學習會變做較簡單。」

作者表示,故事雖然是家己想出來的,但是冊內底養殖的智識,攏有向漁民一項一項來請教。希望這套尪仔冊,會當予人瞭解漁業的實際情況,嘛會當重視產地對食品安全的重要性。

全台敬老金大調查

相關新聞