竹市謝國際捐疫苗 有人創空共波蘭國旗掛倒反

新竹市為著感謝國際捐疫苗予台灣,佇南寮漁港掛日本等6个國家的國旗,毋過煞有人刁工創空,共波蘭的國旗掛顛倒反,變做是印尼的國旗,這款行為實在誠無尊重波蘭。

新竹南寮漁港頂禮拜開始共包括日本、美國、波蘭等等6國的國旗掛起去,感謝遮的國家捐疫苗予台灣。想袂到有民眾向市議員反映,波蘭的國旗掛顛倒頭矣,實在真失禮。

國民黨新竹市議員黃文政表示,「十月初一阮有去現場看,確實是掛顛倒頭,這有可能是有人作孽。我的意思是,毋著的時陣趕緊改正過來,按呢避免予人笑,對捐疫苗的國家嘛無禮貌。」

新竹市政府趕緊對外澄清,掛起去彼當日確定攏是正確的,目前已經報案,欲掠出作孽的人。

新竹市產發處副處長林柏志講,「第一時間已經通報警察單位進行調查,阮希望國旗是一个國家的象徵,袂使加誣,相關的國旗應該受著尊重。」

目前初步了解,掛國旗的所在一般民眾攏會使倚近,市府紲落來嘛會派人加強巡查,避免這款的狀況閣再發生。

全台敬老金大調查

相關新聞