黃牌.紅牌機車通騎去蘇花改 今日起試辦6個月

對30中晝開始,試辦6個月251CC以上的,紅牌佮黃牌重型oo-tóo-bái,會當上蘇花改。這段時間會觀測磅空內底的狀況,才來做上尾的評估。爭取oo-tóo-bái路權的民間團體表示,這本來就是騎oo-tóo-bái愛有的權利,除了重型機車,in嘛會繼續爭取開放普通重型的oo-tóo-bái。

30中晝開始,大型重型機車、也就是251cc以上的紅牌佮黃牌的oo-tóo-bái,會當騎起去蘇花改,毋過交通部是講先試辦通行6個月,期間會觀測磅空內底的狀況,評估敢有適合開放。爭取oo-tóo-bái路權的民間團體表示,這本來就是機車騎士愛有的權利。

台灣機車路權促進會公關主任劉成謙表示,「蘇花改伊是省道,本來就應該還予阮。紲落來阮閣會積極爭取,包括白牌oo-tóo-bái,伊佇蘇花改的權利。若是無法度騎蘇花改這條道路,阮就愛行蘇花公路,比並之下蘇花公路是閣較舊的公路,oo-tóo-bái佮自小客車,比起來是較弱勢的,予弱勢的用路人去行蘇花公路,這是有一寡受著質疑的。」

公路總局表示,當初環境評估認為,較長的磅空無適合ou-tou2-bai2,是可能有用路人健康的問題,大型重型機車是比照轎車的路權,所以才會使開放。

公路總局交管控制中心主任陳國正回應,「當初環評團體就提出這有遐爾長的磅空,In就希望限制oo-tóo-bái的通行,當時就有按呢的承諾。佇長磅空騎車,oo-tóo-bái的通行,敢會因為磅空內底的環境,造成in適應上敢會有問題。」

因為牽涉著環評法,目前猶是無開放普通重型機車。民間團體表示,公路總局過去真濟阻擋的理由,in攏有科學數據會使反駁。in嘛佇面冊開直播,欲共逐家證明,機車騎佇蘇花改是安全的。
 

全台敬老金大調查

相關新聞