尊重多元信仰 北醫大病院推動穆斯林友善計畫
郭柏均 張育睿 / 台北報導
發布時間：
更新時間：
目次
台灣的穆斯林人口、大約有30萬人，In逐工攏愛朝拜5擺，食的食材嘛有嚴格的宗教規範。北醫大附設病院、這站仔咧推動、穆斯林友善計畫，希望予穆斯林佇台灣、也有符合in宗教信仰的病院環境。
鋪禮拜毯，向聖地麥加的方向朝拜，一工愛做五擺，這是穆斯林的日常。毋過佇台灣，穆斯林的人口算是少數，包括朝拜，食食等等的宗教規範，實踐起來會拄著真濟困難。
伊斯蘭商務發展有限公司教長蔡劼甫指出：「首先就是食食的問題，因為伊斯蘭宗教教義的規範，阮除了豬肉、酒精類，猶有相關其他動物，雞鴨牛羊肉，攏有一寡食材的要求。佇台灣現行的社會環境當中，欲得著符合in日常的食物，就真無簡單，何況是就醫」
北醫大附設病院啟動穆斯林友善計畫，除了設置穆斯林祈禱室佮淨身設備，佇灶跤，嘛設置穆斯林食食專門處理區，鼎、刀等等用品攏分開使用，另外閣有清真認證商品專區，專門賣有清真標章的商品。
台北醫學大學附設醫院營養室主任蘇秀悅表示：「HALAL認證，伊的認證愛特別採買，毋是咱一般佇市場買的。煮食的調味品，逐家攏想講莫用酒精，這當然無問題，但是落尾認證的時才發見，原來豆油嘛可能有酒精」
北醫大附設病院表示，其他北醫體系的病院，親像雙和病院、萬芳病院等等，嘛會啟動穆斯林友善計畫，希望佇台灣的穆斯林，會使得著四序的就醫環境。
