斯洛伐克送咱16萬筒AZ到貨 有效期限到11月底

歐洲國家斯洛伐克捐予咱臺灣16萬筒AZ疫苗,26早起送到位,外交部、總統府攏表示感謝,這批疫苗期限是到10月底、11月底,指揮中心講,會趕緊檢驗、封緘。另外,指揮中心也公布對29開始,會配送AZ疫苗到各縣市,予注過1筒AZ,已經閬10禮拜,52歲以上民眾,來注第2筒AZ疫苗。

歐洲國家斯洛伐克,捐予咱國16萬筒AZ疫苗,26早起6點14分由長榮航空的機逝載來臺灣,了後疫苗會送去冷鏈物流進行檢驗封緘。外交部佮總統府都對此表示感謝,強調斯洛伐克是臺灣佇中東歐的民主友志。

外交部副發言人崔靜麟表示:「外交部對斯洛伐克政府佮人民,慷慨的善意表達誠懇的感謝,斯洛伐克是咱國佇中東歐,堅定的民主友志,兩國共享自由民主佮人權等普世價值,兩國合作抗疫,對中央到地方政府,共兩國人民的友誼箍做伙。」

指揮官陳時中嘛專工掛斯洛伐克圖形特殊的喙罨表示感謝,這批疫苗有效期限是到10月31佮11月30,加上日本25送予臺灣的50萬筒,攏總66萬筒AZ疫苗,攏會予欲注第二筒的對象列名冊。指揮中心也公布AZ第二筒,會對9/29開始,分批配送予地方政府安排,7/22前注過第一筒AZ,而且已經閬10禮拜,52歲以上民眾,來注第2筒AZ疫苗。
 

中央流行疫情指揮中心指揮官陳時中表示:「9/29配送落去,毋過這馬縣市政府內面,猶有一寡疫苗的庫存開始來注,現此時咱有疫苗,就趕緊來注。」

最近濟濟國家送臺灣疫苗,尤其是日本已經攏總捐390萬筒予咱,毋過日本自民黨外交部會會長,參議員佐藤正久佇推特預告「猶未結束」,日本會繼續提供必要的疫苗支援。抑若立陶宛頂日仔宣佈閣會捐予臺灣23萬6千筒的疫苗,按算十月中會送來臺灣。

 

2022杭州亞運 台灣百金之路

相關新聞