臺灣新文化運動月 線頂表演.實體展覽紹介文協
郭柏均 林郁凱/臺北報導
發布時間：
更新時間：
來看100冬前，臺灣的智識份子，成立臺灣文化協會，引進西方和日本進步的思想，培養臺灣人的文化意識。這馬臺北市文化局佮臺灣文化運動紀念館，推出紀念活動，欲予民眾了解，斯當時的文化協會，是按怎啟蒙臺灣社會。
一支一支的山球箠，插佇桶仔內底，摃山球是林獻堂的興趣。閣有留聲機，霧峰林家招待人客的時陣，會用來放送音樂。濟濟物件展出百冬前臺灣文化協會成員私底下的興趣
臺灣新文化運動紀念館長許美惠講，「這攏是佇1920年代，臺灣就看會著的休閒娛樂，所以逐家來遮就會感覺講，喔，原來100年前，林獻堂就真佮意去海水浴場。」
配合台灣文化協會一百冬紀念，台北市文化局佮臺灣文化運動紀念館舉辦「新文化運動月」活動，對9月25開始到11月14，有各種活動會使參與，認捌當年推動文化的精神。
館長許美惠也表示，「有真濟線頂活動，包括阮有推出20集的podcast講座，線頂嘛會推出音樂會佮戲劇的演出。實體的活動，除了今仔日開幕的記者會佮展覽，阮佇10月16佇永樂廣場，大稻埕街區遮，推出變裝音樂會市集，市集包括百年店頭，佮這馬有咧做臺灣史相關商品的店頭。」
臺北市長柯文哲是講，「全臺灣保存上完整的1920年代街區的樣，就是大稻埕。所以佇大稻埕這个所在，你就會使感受著1920到1930年代，百冬前的歷史就佇你的身軀邊。」
1920年代的文協成員，受著濟濟國際的影響，為當時的台灣社會引進真濟進步、多元的思想。許美惠講，百冬了後推出活動，希望這馬的台灣人會使對遮的歷史當中，學習按怎建構閣較好的社會。
專題｜改造地獄路 台灣行人路為何難行？
