認養流浪動物頭1年保險免費 手術.蹛院攏有補助

細隻狗仔傱來傱去，看起來真古錐，新竹市對10月開始推出免費的寵物保險，民眾只要來遮認養流浪狗，就有頭一年免費的保險，望會當提升民眾認養流浪動物的意願。

民眾誠肯定這个政策，「狗仔破病，主人上煩惱的，就是狗仔的健康佮醫療所費。若是政府提供保險，我想會提升領養的意願。」也有人表示，「（這个政策）感覺誠好，因為這馬流浪狗傷過濟，總是希望狗仔會當有好的居所，會當好好仔過日。」

新竹市動物收容所目前有180隻狗仔。狗仔送來園區了後，會先進行隔離檢疫佮健康評估，確認健康了後閣會注預防射，才開放民眾認養。

新竹市動保所長楊家民表示，「提供頭一年的寵物保險，寵物保險內底，包括未來寵物的門診、醫療手術，攏有醫療費用的補助。希望透過活動，民眾會當踴躍認養流浪動物。」

動保所提醒民眾，想欲認養必須愛滿20歲，才符合資格。歡迎逐家做伙來保護動物、尊重性命。