臺北愛樂歌劇坊 新戲齣結合交響樂.布袋戲

「有啥物辦法，會當予我親愛的巴斯蒂妮，回心轉意？」

台語口白唸的主角是外國名，閣佮交響樂敆做伙。布袋戲尪仔隨聲樂家的歌聲佮樂團演奏，演出音樂神童Mozart 12歲創作的《可愛的牧羊女》，描繪小情侶之間的戀愛問題。台北愛樂歌劇坊佮台洋劇團等等合作，共中西藝術敆鬥陣，招逐家看一齣真無仝款的布袋戲。

台洋劇團藝術總監，羅斌表示：「阮目的是共布袋戲推廣去世界各地，閣有紹介予台灣的少年觀眾，有遐邇大的力量佇後壁演出，是足讚、足好耍的。」

導演陳昶旭表示：「操偶師因為本身使用的台詞是台語，所以佇台語頂懸伊誠斟酌，使用一寡阮定定聽著的俗語話，抑是特別有意思的諺語，佇規齣戲內底。」

除了《可愛的牧羊女》，閣有另外一齣《頑童與魔法》的歌劇，台北愛樂歌劇坊表示，受疫情影響，真難得20閣通重新佇國家音樂廳佮觀眾見面。這改因應疫情，現場用梅花座、閣有線頂收看兩種方式。希望民眾佇防疫的前提下，支持藝文活動。